2. മാനസാന്തരം ആശ്വാസകാലങ്ങൾ നൽകുന്നു(Repentance Brings Refreshing) Acts 3:19

പ്രവൃ 3:19

“ആകയാൽ നിങ്ങളുടെ പാപങ്ങൾ മാഞ്ഞുകിട്ടേണ്ടതിന്നു മാനസാന്തരപ്പെട്ടു തിരിഞ്ഞുകൊൾവിൻ; എന്നാൽ കർത്താവിന്റെ സമ്മുഖത്തുനിന്നു

ആശ്വാസകാലങ്ങൾ വരികയും” എന്നു വായിക്കുന്നു. (പ്രവൃത്തികൾ 3:19). മുടന്തനായ മനുഷ്യനെ സുഖപ്പെടുത്തിയതിനുശേഷം പത്രോസ് അപ്പോസ്തലൻ ജനത്തിനു നൽകിയ ആഹ്വാനം അത്യന്തം ശക്തവും ഹൃദയസ്പർശിയുമായിരുന്നു: “മാനസാന്തരപ്പെട്ടു ദൈവത്തിലേക്കു തിരിയുവിൻ.” മാനസാന്തരം എന്നത് പാപത്തിൽ ദുഃഖിക്കുന്നതിൽ മാത്രം ഒതുങ്ങുന്ന ഒന്നല്ല; അത് പാപകരമായ ജീവിതത്തിൽ നിന്ന് പൂർണ്ണമായി പിന്തിരിഞ്ഞ് ദൈവഹിതത്തിലേക്കുള്ള സമ്പൂർണ്ണമായ മടങ്ങിവരവാണ്. തിരുവെഴുത്തുകളുടെ ചരിത്രവും സഭാ നവോത്ഥാനങ്ങളുടെ അനുഭവങ്ങളും തെളിയിക്കുന്നത്, യഥാർത്ഥ ആത്മീയ ഉണർവിന് മുമ്പ് ആഴമേറിയ അനുതാപം ഉണ്ടായിരുന്നുവെന്നതാണ്. ഹൃദയങ്ങൾ ശുദ്ധീകരിക്കപ്പെടുമ്പോൾ പരിശുദ്ധാത്മാവ് ശക്തമായി പ്രവർത്തിക്കുകയും ആത്മീയമായ പുതുക്കൽ, സ്വർഗീയ സന്തോഷം, വിശുദ്ധജീവിതം, ആത്മീയ ശക്തി എന്നിവ ദൈവജനത്തിന്റെ ജീവിതത്തിൽ പ്രകടമാകുകയും ചെയ്യുന്നു.

A. മാനസാന്തരം പാപത്തിൽ നിന്നുള്ള ശുദ്ധീകരണം കൊണ്ടുവരുന്നു

പാപത്തെ അംഗീകരിക്കുകയും അതിൽ നിന്ന് പിന്തിരിയുകയും ചെയ്യുന്നതിലൂടെയാണ് യഥാർത്ഥ മാനസാന്തരം ആരംഭിക്കുന്നത്. പാപം ദൈവവും മനുഷ്യനും തമ്മിലുള്ള ആത്മീയ ബന്ധത്തേയും കൂട്ടായ്മയേയും തകർക്കുന്നു. ഹൃദയത്തിൽ കാഠിന്യവും ആത്മാവിൽ അകൽച്ചയും ഉണ്ടാക്കുന്ന പാപം, ദൈവസന്നിധിയിലെ സമാധാനവും സന്തോഷവും നഷ്ടപ്പെടുത്തുന്നു. എന്നാൽ മാനസാന്തരം ആ ബന്ധത്തെ വീണ്ടും വിളക്കിചേർക്കുന്ന ദൈവിക മാർഗമാണ്. 1 യോഹ 1:9-ൽ, “നമ്മുടെ പാപങ്ങളെ ഏറ്റുപറയുന്നു എങ്കിൽ അവൻ നമ്മോടു പാപങ്ങളെ ക്ഷമിച്ചു സകല അനീതിയും പോക്കി നമ്മെ ശുദ്ധീകരിപ്പാൻ തക്കവണ്ണം വിശ്വസ്തനും നീതിമാനും ആകുന്നു.” എന്നുള്ള ഉറപ്പ് നമുക്കു നൽകപ്പെടുന്നു.

ദാവിദ് രാജാവ് ബേത്ത്‌ശേബയുമായുള്ള പാപത്തിനുശേഷം ആഴത്തിലുള്ള തകർച്ചയോടും അനുതാപഹൃദയത്തോടും കൂടെ സങ്കീർത്തനം 51-ൽ പ്രാർത്ഥിച്ചതു: “ദൈവമേ, നിർമ്മലമായോരു ഹൃദയം എന്നിൽ സൃഷ്ടിച്ചു സ്ഥിരമായോരാത്മാവിനെ എന്നിൽ പുതുക്കേണമേ.” എന്നാണ്. ദാവീദിന്റെ യഥാർത്ഥ അനുതാപം അവനെ ദൈവവുമായി വീണ്ടും അടുപ്പത്തിലേക്കും ആത്മീയ യഥാസ്ഥാപനത്തിലേക്കും നയിച്ചു.

പരിശുദ്ധാത്മാവിനോട് നിങ്ങളുടെ ഹൃദയം പരിശോധിക്കണമെന്നു അപേക്ഷിക്കാമോ? സങ്കീർത്തനം 139:23–24ൽ “ദൈവമേ, എന്നെ ശോധന ചെയ്തു എന്റെ ഹൃദയത്തെ അറിയേണമേ; എന്നെ പരീക്ഷിച്ചു എന്റെ നിനവുകളെ അറിയേണമേ. വ്യസനത്തിന്നുള്ള മാർഗ്ഗം എന്നിൽ ഉണ്ടോ എന്നു നോക്കി, ശാശ്വതമാർഗ്ഗത്തിൽ എന്നെ നടത്തേണമേ” എന്നു വായിക്കുന്നു. മറച്ചുവെക്കുന്ന പാപം ആത്മീയ വളർച്ചയെ തടയും, എന്നാൽ സത്യസന്ധമായ ഏറ്റുപറച്ചിൽ ദൈവകൃപയിലേക്കു നയിക്കും. പാപത്തെ ന്യായീകരിക്കാതെ, താഴ്മയോടും തുറന്ന ഹൃദയത്തോടും കൂടി ദൈവസന്നിധിയിലേക്കു കടന്നുവരുമ്പോൾ അവൻ ക്ഷമിക്കുകയും ശുദ്ധീകരിക്കുകയും പുതുക്കുകയും ചെയ്യുന്നു.

B. മാനസാന്തരം സന്തോഷവും കൂട്ടായ്മയും പുനഃസ്ഥാപിക്കുന്നു

പാപം നമ്മെ ദൈവത്തിൽ നിന്ന് വേർപെടുത്തുക മാത്രമല്ല, നമ്മുടെ ആത്മീയ സന്തോഷവും സമാധാനവും കവർന്നെടുക്കുകയും ചെയ്യുന്നു. ദൈവസന്നിധിയിൽ ഉണ്ടായിരുന്ന ആനന്ദം നഷ്ടപ്പെടുമ്പോൾ ഹൃദയം ശൂന്യവും ആത്മാവ് വരണ്ടതുമായി അനുഭവപ്പെടാം. എന്നാൽ യഥാർത്ഥ മാനസാന്തരം മനുഷ്യനെ വീണ്ടും ദൈവസാന്നിധ്യത്തിലേക്കും രക്ഷയുടെ സന്തോഷത്തിലേക്കും തിരികെ നയിക്കുന്നു.

ലൂക്കോസ് 15-ൽ കാണുന്ന മുടിയൻപുത്രന്റെ ഉപമ ഇതിന്റെ മനോഹരമായ ഉദാഹരണമാണ്. തന്റെ അവകാശം പാഴാക്കി ദുരിതത്തിലായ ശേഷം അവൻ തന്റെ തെറ്റ് തിരിച്ചറിയുകയും പിതാവിന്റെ അടുക്കലേക്ക് മടങ്ങി വരികയും ചെയ്തു. അവൻ തിരികെ വന്നപ്പോൾ പിതാവ് അവനെ ശാസിക്കുകയോ തള്ളിക്കളയുകയോ ചെയ്തില്ല; പകരം സ്നേഹത്തോടും സന്തോഷത്തോടും ആഘോഷത്തോടും കൂടി സ്വീകരിച്ചു. ഓർക്കുക, ദൈവം തന്റെ അടുക്കലേക്ക് മടങ്ങിവരുന്നവരെ എത്ര കരുണയോടും സ്നേഹത്തോടും കൂടി യഥാസ്ഥാനപ്പെടുത്തുന്നു എന്നതിന്റെ ശക്തമായ ചിത്രമാണിത്.

സങ്കീർത്തനം 51:12-ൽ ദാവിദ്പ്രാർത്ഥിച്ചു: “നിന്റെ രക്ഷയുടെ സന്തോഷം എനിക്കു തിരികെ തരേണമേ.” ദൈവികമായ മാനസാന്തരം കുറ്റവിചാരണയിലേക്കല്ല, മറിച്ച് ക്ഷമയിലേക്കും പുതുക്കലിലേക്കും നയിക്കുന്നു. നിങ്ങൾക്ക് ആത്മീയമായി അകൽച്ചയോ വരൾച്ചയോ അനുഭവപ്പെടുന്നുവെങ്കിൽ, ദൈവത്തിലേക്കുള്ള മടങ്ങിവരവാണ് പുതുജീവന്റെ വഴി. തുറന്ന കൈകളോടെ സ്വീകരിക്കാൻ ദൈവം ഇന്നും തയ്യാറായി നിൽക്കുന്നു.

C. മാനസാന്തരം ആത്മീയ ഉന്മേഷവും ഉണർവ്വും വെളിപ്പെടുത്തുന്നു.

പ്രവൃത്തികൾ 3:19 ൽ മാനസാന്തരത്തെ “ആശ്വാസകാലങ്ങളുമായി” ബന്ധിപ്പിക്കുന്നു. ഇവിടെ ഉപയോഗിച്ചിരിക്കുന്ന ആശയം ആത്മീയ ഉണർവ്, പുതുക്കൽ, ദൈവസാന്നിധ്യത്തിൽ നിന്നുള്ള ഉന്മേഷം എന്നിവയെ സൂചിപ്പിക്കുന്നതാണ്. മനുഷ്യർ അവരുടെ പാപങ്ങളെ വിട്ട് ദൈവത്തിലേക്ക് ഹൃദയപൂർവ്വം മടങ്ങുമ്പോൾ പരിശുദ്ധാത്മാവ് പുതുജീവനും ആത്മീയ ശക്തിയും പകർന്നു നൽകുന്നു. യഥാർത്ഥ ഉണർവ് ബാഹ്യമായ പരിപാടികളിൽ അല്ല, മറിച്ച് ഹൃദയത്തിന്റെ ആഴത്തിലുള്ള മാറ്റത്തിലാണ് ആരംഭിക്കുന്നത്.

പഴയനിയമ പുസ്തകമായ യോനയുടെ പുസ്തകത്തിൽ, യോനയുടെ പ്രസംഗം കേട്ടപ്പോൾ നീനെവേയിലെ ജനങ്ങൾ അവരുടെ ദുഷ്ടവഴികളിൽ നിന്ന് തിരിഞ്ഞു അനുതപിച്ചു. രാജാവിൽ നിന്ന് തുടങ്ങി സാധാരണജനങ്ങൾ വരെ എല്ലാവരും ഉപവസിക്കുകയും ദൈവസന്നിധിയിൽ താഴുകയും ചെയ്തു. അവരുടെ യഥാർത്ഥ അനുതാപം ദൈവത്തിന്റെ കരുണയുടെ പകർച്ചയ്ക്കു കാരണമായി, നഗരം ന്യായവിധിയിൽ നിന്ന് രക്ഷിക്കപ്പെട്ടു.

സഭാചരിത്രത്തിലും ഇതേ സത്യം കാണാവുന്നതാണ്. അസൂസ സ്റ്റ്രീറ്റ് ഉണർവ് പോലുള്ള മഹത്തായ ഉണർവുകൾ ആഴമുള്ള അനുതാപം, ഏറ്റുപറച്ചിൽ, വിശുദ്ധിയിലേക്കുള്ള സമർപ്പണം എന്നിവയാൽ അടയാളപ്പെടുത്തപ്പെട്ടിരിക്കുന്നു. അത്തരം ഹൃദയങ്ങളിലാണ് പരിശുദ്ധാത്മാവ് ശക്തമായി പ്രവർത്തിച്ചത്. ഈയടുത്ത വർഷങ്ങളായി നമ്മുടെ ചുറ്റുപാടുകളിൽ കണ്ടുകൊണ്ടിരിക്കുന്ന ഉണർവ്വു കോലാഹലങ്ങൾക്കു ഇതുമായി ഏറെ ബന്ധമൊന്നും ഇല്ലെന്നും തിരിച്ചറിയുക. 

ഉണർവ് ജനങ്ങൾ കൂട്ടമായ് കൂടിവരുന്നതിനാൽ ഉണ്ടാകുന്നതല്ല; അത് വ്യക്തിപരമായ മാനസാന്തരത്തിൽ ആരംഭിക്കുന്നു. നിങ്ങൾ ആത്മാർത്ഥമായി ദൈവത്തിലേക്ക് മടങ്ങുമ്പോൾ, ആത്മീയ പുതുക്കലിനും പരിശുദ്ധാത്മാവിന്റെ ശക്തിക്കും നിങ്ങളുടെ ഹൃദയം തുറക്കപ്പെടുന്നു.

ചുരുക്കത്തിൽ മാനസാന്തരം ഒരിക്കൽ മാത്രം ചെയ്യുന്ന ഒരു ചടങ്ങോ മതാചാരമോ അല്ല; അത് ദൈവത്തിലേക്ക് സ്ഥിരമായി തിരിയുന്ന ഒരു ആത്മീയ ജീവിതശൈലിയാണ്. ഓരോ ദിവസവും നമ്മുടെ ഹൃദയവും ചിന്തകളും പ്രവൃത്തികളും ദൈവഹിതത്തിന് അനുസരിച്ച് പരിശോധിക്കുകയും തിരുത്തുകയും ചെയ്യുമ്പോൾ ആത്മീയ വളർച്ച സംഭവിക്കുന്നു. യഥാർത്ഥ മാനസാന്തരം നമ്മെ പാപത്തിന്റെ ബന്ധനങ്ങളിൽ നിന്ന് ശുദ്ധീകരിക്കുകയും ദൈവസാന്നിധ്യത്തിലെ സമാധാനവും സന്തോഷവും വീണ്ടും അനുഭവിപ്പിക്കുവാൻ ഇടവരുത്തുകയും ചെയ്യുന്നു. അതോടൊപ്പം അത് ആത്മീയ ഉണർവിനും പരിശുദ്ധാത്മാവിന്റെ പുതുക്കലിനും ഹൃദയം തുറക്കുകയും ചെയ്യുന്നു.

ദൈവം മനുഷ്യനെ ശിക്ഷിക്കുവാനോ തള്ളിക്കളയുവാനോ അല്ല വിളിക്കുന്നത്; മറിച്ച് പുതുജീവിതത്തിലേക്കും കൃപയിലേക്കുമാണ് വിളിക്കുന്നത്. മനുഷ്യൻ തന്റെ തെറ്റുകളും കുറവുകളും തിരിച്ചറിഞ്ഞ് വിനയത്തോടെ ദൈവസന്നിധിയിൽ വരുമ്പോൾ അവൻ ക്ഷമിക്കുകയും പുതുക്കുകയും ശക്തിപ്പെടുത്തുകയും ചെയ്യുന്നു. ദൈവത്തിന്റെ ഹൃദയം എല്ലായ്പ്പോഴും പുനഃസ്ഥാപനത്തിന്റെയും കരുണയുടെയും ഭാഗത്താണ്.

2 ദിനവൃത്താന്തം 7:14-ൽ നാം വായിക്കുന്നത്: “എന്റെ നാമം വിളിക്കപ്പെട്ടിരിക്കുന്ന എന്റെ ജനം തങ്ങളെത്തന്നേ താഴ്ത്തി പ്രാർത്ഥിച്ചു എന്റെ മുഖം അന്വേഷിച്ചു തങ്ങളുടെ ദുർമ്മാർഗ്ഗങ്ങളെ വിട്ടു തിരിയുമെങ്കിൽ, ഞാൻ സ്വർഗ്ഗത്തിൽനിന്നു കേട്ടു അവരുടെ പാപം ക്ഷമിച്ചു അവരുടെ ദേശത്തിന്നു സൌഖ്യം വരുത്തിക്കൊടുക്കും.” 

അതുകൊണ്ട് മാനസാന്തരം ഭയത്തിന്റെ വഴി അല്ല; അത് കൃപയിലേക്കും ഉണർവിലേക്കും ദൈവിക പുതുജീവിതത്തിലേക്കും നയിക്കുന്ന അനുഗ്രഹീതമായ പാതയാണ്. ആമ്മേൻ.